தக்காளி குருமா இட்லி, தோசை, சப்பாத்தி மற்றும் பூரியுடன் சுவையாக இருக்கும்,  வழக்கமான சட்னி, சாம்பார் தவிர இதுபோன்ற வித்தியாசமான குருமா இட்லி, தோசைக்கு தனி சுவை தரும். தக்காளி குருமா வெங்காயம், தக்காளி, இஞ்சி-பூண்டு விழுது, உப்பு, மிளகாய் தூள், கரம் மசாலா, மற்றும் தேங்காய் விழுது ஆகியவற்றை கொண்டு செய்யப்படுகிறது. சுவையான தக்காளி குருமா வகை நீங்களும் செய்து சுவைத்து மகிழுங்கள்.

தக்காளி  குருமா செய்ய தேவையான பொருட்கள்

• 1 பழுத்த தக்காளி
• 1 பெரிய வெங்காயம்
• சிறிதளவு புதினா
• சிறிதளவு கொத்தமல்லி
• 1 தேக்கரண்டி இஞ்சி பூண்டு விழுது
• 1 தேக்கரண்டி மிளகாய் தூள்
• 1/2 தேக்கரண்டி மல்லித்தூள்
• 1/4 தேக்கரண்டி மஞ்சள் தூள்
• 1/2 தேக்கரண்டி கரம் மசாலாத்தூள்
• உப்பு தேவையான அளவு
• 2 தேக்கரண்டி சமையல் எண்ணெய்

அரைக்க தேவையான பொருட்கள்

• 1/4 கப் துருவிய தேங்காய்
• 2 தேக்கரண்டி பொட்டுகடலை
• 1 தேக்கரண்டி கசகசா

தக்காளி குருமா செய்முறை

1. ஒரு வாணலியில் எண்ணெய் சேர்த்து சூடானதும் கடுகு மற்றும் கறிவேப்பிலை சேர்த்து தாளிக்கவும்.

2. பின்னர் பொடியாக நறுக்கிய வெங்காயத்தை சேர்த்து வதக்கவும்.

3. பின்னர் பொடியாக நறுக்கிய கொத்தமல்லி மற்றும் புதினா சேர்த்து கலக்கவும்.

4. அதனுடன் ஒரு தேக்கரண்டி இஞ்சி பூண்டு விழுது சேர்க்கவும்.

5. இப்பொழுது பொடியாக நறுக்கிய தக்காளி சேர்த்து வதக்கவும்.

6. தக்காளி வதங்கியதும் உப்பு, மஞ்சள்தூள், மிளகாய்த்தூள், மல்லித்தூள், கரம் மசாலாத்தூள், ஆகியவற்றைச் சேர்த்து கலக்கவும்.

7. அதனுடன் 1/4 கப் அளவு தண்ணீர் சேர்த்து 5 முதல் 8 நிமிடங்களுக்கு மூடி வைத்து கொதிக்க விடவும்.

8. ஒரு மிக்ஸி ஜாரில் தேங்காய், பொட்டுக்கடலை மற்றும் கசகசா ஆகியவற்றை சேர்த்து சிறிதளவு தண்ணீர் சேர்த்து மைய அரைத்துக் கொள்ளவும்.

9. குருமா நன்கு கொதித்து வந்ததும்,  அரைத்து வைத்த தேங்காய் விழுதை சேர்த்து 2 முதல் 3 நிமிடங்களுக்கு கொதிக்க வைக்கவும்.

10. சுவையான தக்காளி குருமா தயார்.